मद्यधुंद अवस्थेत महिलेने महामार्गावर घातला गोंधळ

मुंबई-आग्रा महामार्गावर धुळे जिल्ह्यात एका महिलेने  मद्यप्राशन करून  धिंगाणा घातला असल्याचा हा प्रकार घडला.पोलिसांनी विचारपूस सुरु केली असता महिलेने पोलिसाची कॉलर पकडली. त्यांना धक्काबुक्की करत अर्वाच्च भाषेत शिवीगाळ केली.याप्रकरणी दोघांविरुद्ध गुन्हा दाखल करण्यात आलं आहे.अलका किशोर पाटील आणि तिचा दीर भूषण ज्ञानेश्वर पाटील अशी गोंधळ घालण्याऱ्या व्यक्तींची नावे आहेत.

धुळे जिल्ह्यात शिंदखेडा तालुक्यातील नरडाणा येथील जुन्या टोलनाक्यापासून जवळच गस्त घालत असताना पोलीस उपनिरीक्षक आणि काही कर्मचारी त्या ठिकाणी आले. त्या पुरुषाला विचारणा करत असताना महिलेने उलट पोलिसांनाच शिवीगाळ करत धक्काबुक्की केली. यावेळी घटनास्थळी पोलिसांनी दारुच्या बाटल्या ताब्यात घेतल्या. संबंधित महिला आणि पुरुषाने म्हणजेच तिच्या दीराने मद्यप्राशन केल्याचे प्राथमिक चौकशीत समोर आल्याचे पोलिसांनी यावेळी सांगितले.

 पोलिसांच्या कामात अडथळा निर्माण केल्याप्रकरणी आणि पोलिसांना धक्काबुक्की केल्याप्रकरणी नरडाणा पोलिस ठाण्यात दोघांविरुद्ध गुन्हा दाखल करण्यात आला आहे. याप्रकरणी या दोघांविरुद्ध गुन्हा दाखल करण्यात आला असून लवकरच त्यांना अटक करण्यात येणार असल्याची माहिती पोलीस अधीक्षक चिन्मय पंडित यांनी दिली आहे