करमाळा : जन्मत:च तिच्या हृदयाला छिद्र असतानाही ती वर्गातील मुलींसोबत सहलीला सज्जनगडावर गेली. सज्जनगडच्या वाहन तळापासून तिने गड चढला. पूर्ण गड चढून ती सज्जनगडावर पोहोचली. तिला इतका आनंद झाला. तिने तत्काळ तिच्या वडिलांना फोन केला. ‘पप्पा मी गड चढला.’ असं म्हणताच ती खाली कोसळली. तिला रुग्णालयात नेण्यात आलं. मात्र, उपचारादरम्यान तिची प्राणज्योत मालवली. ही
हृदयद्रावक घटना रविवारी सकाळी साडेअकराच्या सुमारास सज्जनगडावर घडली. श्रावणी राहुल लिमकर वय १६, रा.मेन रोड, करमाळा असे मृत्यू झालेल्या दुर्दैवी मुलीचे नाव आहे. श्रावणी ही येथील महात्मा गांधी विद्यालयात दहावीत शिक्षण घेत होती. करमाळ्यामध्येच तिने एक खासगी क्लास लावला होता. या क्लासमधील मुला-मुलींची सहल रविवार 27 रोजी सज्जनगडावर गेली होती. सज्जनगडावरील वाहन तळावर सर्वजण वाहनातून उरतल्यानंतर हळूहळू चालत पायऱ्यांवरून सर्व मुले सज्जनगडावर निघाले. यात श्रावणीही चालत निघाली होती. पायऱ्या चढून गडावर पोहोचल्यानंतर तिला थोडी धाप लागली होती. परंतु, यापेक्षा तिला आपण हृदयाने कमजोर असताना गडावर पोहोचल्याचा आनंद झाला. तिने तिच्या वडिलांना मोबाइलवर फोन केला. पप्पा, बघा तुम्ही म्हणत होता. जाऊ नका. पण मी गड चढला, असं म्हणताच ती खाली कोसळली. तिच्या शेजारी असलेल्या इतर मुलींनी तिला तातडीने आधार दिला. तिची शुद्ध हरपली होती. पायऱ्या उतरून तिला कसेबसे वाहनतळापर्यंत आणण्यात आले. यानंतर
तातडीने तिला साताऱ्यातील खासगी रुग्णालयात दाखल करण्यात आले. मात्र, उपचारांदरम्यान तिचा मृत्यू झाला. रविवारी रात्री उशिरा करमाळयात तिचा मृतदेह आणल्यानंतर सोमवारी सकाळी तिच्या पार्थिवावर अंत्यसंस्कार करण्यात आले.
0 Comments