लेक लाडकी योजनेचा लाभ घ्या, 1 लाख रुपये मिळवा; कसा व कुठे कराल अर्ज?

लेक लाडकी या योजनेचा लाभ कोणाला मिळणार?

पिवळ्या व केशरी रेशनकार्डधारक कुटुंबात मुलीचा जन्म झाल्यावर 5 हजार रुपये , इयत्ता पहिलीत गेल्यावर 6 हजार रुपये , सहावीत गेल्यावर 7 हजार रुपये, 11 वीत गेल्यावर 8 हजार रुपये, 18 वर्षे पूर्ण झाल्यावर 75 हजार रुपये, अशा रितीने एकूण त्या मुलीस 1 लाख 1 हजार रुपये एवढा लाभ मिळणार आहे.

शासनामार्फ़त थेट लाभार्थी हस्तांतरण (DBT) द्वारे लाभाची रक्कम  लाभार्थ्यांना अदा करण्यात येणार आहे. 1 एप्रिल 2023 नंतर कुटुंबात जन्मणाऱ्या 1 अथवा 2 मुलींना त्याच प्रमाणे 1 मुलगा व 1 मुलगी असल्यास मुलीला या योजनेचा लाभ मिळेल. 

पहिल्या अपत्याच्या तिसऱ्या हप्त्यासाठी व दुसऱ्या अपत्याच्या दुसऱ्या हप्त्यासाठी अर्ज सादर करताना माता, पित्याने कुटुंब नियोजन प्रमाणपत्र सादर करणे अनिवार्य राहील.

'या' योजनेचा लाभ घेण्यासाठी कुठे कराल अर्ज?

तुमच्या भागातील अंगणवाडी सेविकेकडे तुम्हाला या योजनेसाठीचा अर्ज करायचा आहे. या अर्जात तुमची वैयक्तिक माहिती,पत्त्याची माहिती, मोबाईल नंबर, अपत्यांची माहिती, बँक खात्याचा तपशील आणि योजनेच्या कोणत्या टप्प्यातील लाभासाठी अर्ज केला ते लिहायचं आहे. तारीख, ठिकाण टाकून सही करायची आहे.

अर्ज करून झाला की अंगणवाडी सेविकेकडून पोहोच पावती घ्यायची आहे.

या योजनेसाठी आवश्यक कागदपत्रे कोणती?

• लाभार्थीचा जन्माचा दाखला

• कुटुंब प्रमुखांच्या उत्पन्नाचा

 दाखला

• (वार्षिक उत्पन्न 1 लाख रुपयांपेक्षा जास्त नसावे.)

• लाभार्थीचे आधार कार्ड (प्रथम लाभावेळी ही अट शिथिल राहिल.)

• पालकाचे आधार कार्ड

• बँकेच्या पासबुकच्या पहिल्या पानाची झेरॉक्स

• रेशनकार्ड (पिवळे अथवा केशरी   रेशन कार्ड साक्षांकित प्रत)

• मतदान ओळखपत्र

• शाळेचा दाखला

• कुटुंब नियोजन शस्त्रक्रिया प्रमाणपत्र

 अर्ज केल्यानंतर पुढे काय?

अंगणवाडी सेविकेकडे योजनेसाठीचा अर्ज व कागदपत्रे नीट तपासून घेतली की त्याची नोंदणी सरकारच्या ऑनलाईन पोर्टलवर करायची आहे.

त्यानंतर तो अर्ज संबंधित बाल विकास प्रकल्प अधिकाऱ्याकडे द्यायचा आहे. मग अंतिम मंजुरीसाठी महिला व बालविकास अधिकाऱ्याकडे पाठवायचा आहे.