बार्शी! रणजीत सिंह डिसले गुरुजी यांचा शिक्षक पदाचा राजीनामा

बार्शी तालुक्यातील रहिवासी असणारे रणजितसिंह डिसले गुरुजी यांनी आज आपल्या शिक्षक पदाचा राजीनामा माढ्याचे गटशिक्षणाधिकारी शिंदे यांच्याकडे दिल्याची माहिती मिळाली आहे.

ग्लोबल टीचर प्राईज मिळवल्यामुळे त्यांची ओळख देशभरात झाली होती, परंतु नंतरच्या काही दिवसात त्यांच्यावर वेगवेगळे आरोप होऊ लागल्याने त्यांनी शिक्षक पदाचा राजीनामा दिल्याचे बोलले जात आहे. अमेरिकेतील फुलब्राईट संस्थेच्या शिष्यवृत्तीसाठी डिसले यांना जिल्हा परिषद प्रशासनाची परवानगी हवी होती. दीड महिना शिक्षण विभागाने अर्ज प्रलंबित ठेवला, मानिसक त्रास दिला व पैशाची मागणी केली असा त्यांनी केलेला आरोप व मागील तक्रारीवरून चौकशी समितीने सादर केलेला अहवाल या दोन्ही कारणांनी राज्यभर वादळ उठले होते. अखेर माजी शिक्षणमंत्री वर्षा गायकवाड यांनी हस्तक्षेत करीत जिल्हा परिषद प्रशासनाला तात्काळ परवानगी द्यायला लावली.

दरम्यान मानसिक छळ कोणी केला व पैसे कोणी मागितले, अशी सीईओ दिलीप स्वामी यांनी त्यांना नोटीस बजावली. यामुळे डिसले गुरुजींच्या अडचणींत वाढ झाली व त्यांनी पुरस्कार मिळाल्यानंतर जिल्हा प्रशिक्षण संस्था व विज्ञान केंद्रात हजर राहून प्रशिक्षण दिले का, हा वादाचा मुद्दा पुढे आला. डिसले गुरुजींनी आरोपांबाबत प्रशासनाची माफी मागितल्याचे मंगळवारी सांगण्यात आले. ‘आता यापुढे मी प्रसारमाध्यमांपुढे जाणार नाही,’ अशी भूमिका जाहीर करीत प्रकरण थांबविण्याची त्यांनी विनंती केली होती.

दरम्यान, शिक्षक रणजीत डीसले हे डायटला हजर होते का नाही व त्यांच्या एकूणच अनियमिते बाबत जिल्हा परिषदेचे मुख्य कार्यकारी अधिकारी दिलीप स्वामी यांनी पाच अधिकाऱ्यांची चौकशी समिती नेमली होती. त्या चौकशी समितीचा अहवाल आला असून डीसले हे मोठ्या प्रमाणात दोषी आढळले असल्याचे समजते. हा चौकशी अहवाल बाहेर येण्या अगोदरच डीसले यांनी राजीनामा दिला आहे. त्यांनी एक महिन्याची नोटीस देऊन हा राजीनामा दिला असून आठ ऑगस्टपर्यंत त्यांची नोटीस आहे. आता चौकशी अहवालामध्ये काय काय बाहेर येते हे पाहणं मात्र महत्त्वाचे ठरणार आहे.