सोलापूर जिल्ह्यात मराठा समाज कुठे आक्रमक, कुठे ठिय्या आंदोलन सुरु

पंढरपूर/प्रतिनिधी;

सोलापूर जिल्ह्यात मराठा आरक्षण स्थिगिती विरोधात आज बंद पुकारण्यात आला आहे. तर जिल्ह्यातील सर्व आमदार आणि खासदार यांच्या घरासमोर देखील आंदोलनं करण्यात येणार आहेत. ग्रामीण भागात माढामध्ये उग्र स्वरूपाच्या निदर्शने करून या आंदोलनाला सुरुवात झाली आहे. 

पंढरपूर येथील शिवाजी चौकात मराठा समाजाच्या वतीने मोठे आंदोलन उभे करण्यात आले आहे. पंढरपूर विविध पक्षानी या आंदोलन सहभागी झाले आहे. जागरण गोंधळ, ढोलकी वाजवत राज्य सरकारचा निषेद व्यक्त केला. यावेळी पंढरपूरसह जिल्ह्यात मोठा पोलिस बंदोबस्त तैनात करण्यात आला आहे. 

मराठा आरक्षण स्थगिती प्रकरणी आज पुकारलेल्या सोलापूर जिल्हा बंदमध्ये आंदोलकांनी पंढरपूर पुणे महामार्ग रोखून धरला. माढ्यात रस्त्यावर टायर जाळल्यानंतर वेळापूरच्या पुढे असणाऱ्या निमगाव पाटीजवळ मराठा तरुणांनी रस्त्यावर टायर पेटवून रस्ता अडवला. एक मराठा लाख मराठाच्या जोरदार घोषणा देत दोन्ही बाजूनी वाहतूक आंदोलकांनी रोखून धरली.

सोलापूर बंदची हाक मराठा समाजाच्या वतीने देण्यात आली आहे. त्यामुळे सोलापुरात आज सकाळपासूनच बंदला सुरुवात झाली आहे. माढ्यात तर रस्त्यावर टायर जाळून मराठा समाजाच्या वतीने निषेध व्यक्त करण्यात आला आहे. खबरदारी म्हणून सोलापुरात एसटी सेवा बंद ठेवण्यात आली आहे.