सोलापूर - न्यूक्लिअर थर्मल पॉवर कॉर्पोरेशन ऑफ इंडिया सोलापूर येथे एफजीडी प्लांटमध्ये आज ( २० जुलै ) सायंकाळच्या सुमारास मोठा स्फोट झाला. फ्युअल गॅस डिझास्टर हा प्रोजेक्ट नवीन आहे. ट्रायल घेताना तांत्रिक बिघाड झाल्यामुळे हा स्फोट झाला आहे. सुदैवाने या अपघातात कोणत्याही प्रकारची जीवितहानी झाली नाही, अशी माहिती एचआर विभागातील अधिकारी सुभाष वाघमारे यांनी दिली आहे.
एनटीपीसी सोलापूर शहराजवळील फताटेवाडी येथे आहे. जवळपास २२०० एकर मध्ये असलेला हा प्रकल्प २०१७ साली कार्यान्वित झाला होता. येथे १३२० मेगावॅट वीजनिर्मिती होते. केंद्र शासनाच्या या प्रोजेक्टमूळे आजूबाजूच्या परिसरात पर्यावरणावर दुष्परिणाम होऊ नये म्हणून नवीन फ्युअल गॅस डिझास्टर तयार केला जात आहे. आज बुधवारी दुपारी एफजीडीच्या चिमणीच ट्रायल घेताना मोठा स्फोट होऊन आग लागली. ही आग पाहून आजूबाजूला असलेल्या ग्रामस्थांत भीतीचे वातावरण पसरले होते.
एफजीडी म्हणजेच फ्युअल गॅस डिझास्टरचे ट्रायल घेताना हा अपघात झाला. तांत्रिक बिघाडामुळे हा अपघात झाल्याचा प्राथमिक अंदाज एनटीपीसीमधील अधिकाऱ्यांनी व्यक्त केला. याची सविस्तर माहिती घेऊन लवकरच अपघात कशामुळे झाला याचा खुलासा करणार आहेत.
0 Comments