‘अमृता फडणवीसांची वक्तव्यं भाजपच्या नेत्यांनाही आवडत नाहीत…

 

अमृता फडणवीस ज्याप्रकारची वक्तव्यं करतात ती भाजपमधीलच अनेक नेत्यांना आवडत नाही. पण केवळ देवेंद्र फडणवीस यांची पत्नी असल्यामुळे भाजपचे नेते तोंड दाबून बुक्क्यांचा मार सहन करत आहेत, असे वक्तव्य शिवसेना नेत्या मनिषा कायंदे यांनी केले. अमृता फडणवीस यांनी नुकतेच महाविकासआघाडीच्या नेत्यांना लक्ष्य करणारे ट्विट केले होते. या ट्विटमधील भाषेची राजकीय वर्तुळात चांगलीच चर्चा रंगली आहे.

या पार्श्वभूमीवर मनिषा कायंदे यांनी अमृता फडणवीस यांच्या वक्तव्याचा समाचार घेतला. अमृता फडणवीस यांना वर्षा बंगला सोडावा लागल्यामुळे त्या वैफल्यग्रस्त झाल्या आहेत. त्याच नैराश्यातून अमृता फडणवीस टीका करत असतात. अनेकदा त्यांना आपण काय बोलतोय, हेच समजत नाही. भाजपच्या नेत्यांनाही अमृता फडणवीस यांची वक्तव्ये आवडत नाहीत.

अमृता फडणवीस यांच्या वक्तव्यामुळे अनेकदा पक्ष अडचणीत येतो. परंतु, अमृता या देवेंद्र फडणवीस यांची पत्नी असल्यामुळे भाजपचे नेते तोंड दाबून बुक्क्यांचा मार सहन करत आहेत. त्यामुळे भाजपने किमान अमृता फडणवीस यांना पक्षाचे प्रवक्तेपद द्यावे, असे मनिषा कायंदे यांनी म्हटले.

तर दुसरीकडे राज्याच्या शिक्षणमंत्री आणि काँग्रेस नेत्या वर्षा गायकवाड यांनीही अमृता फडणवीस यांच्य वक्तव्याविषयी नाराजी व्यक्त केली. कोणतीही व्यक्ती असो, स्त्री किंवा पुरुष, बोलताना तारतम्य हे बाळगायलाच पाहिजे. राष्ट्रपिता महात्मा गांधीजींच्या पुण्यतिथीला आपण एकमेकांविषयी अशाप्रकारची वक्तव्यं करतोय, हे योग्य नसल्याचे वर्षा गायकवाड यांनी म्हटले.

अमृता फडणवीस यांनी आपल्या ट्विटमध्ये नाना पटोले यांचा उल्लेख ‘नन्हे पटोले’, असा केला होता. याविषयी नाना पटोले यांना प्रतिक्रिया विचारण्यात आली. त्यावर पटोले यांनी म्हटले की, अमृता फडणवीस आमच्या सुनबाई आहेत. त्यांच्याविषयी काही प्रतिक्रिया देणार नाही.

राज्याचे विरोधी पक्षनेते देवेंद्र फडणवीस यांच्या पत्नी अमृता फडणवीस यांनी ट्विटच्या माध्यमातून महाविकासआघाडीतील प्रमुख नेत्यांना डिवचले आहे. अमृता फडणवीस यांनी आपल्या ट्विटमध्ये संजय राऊत, नवाब मलिक आणि काँग्रेस प्रदेशाध्यक्ष नाना पटोले यांच्यावर अप्रत्यक्षपणे निशाणा साधला. अमृता फडणवीस यांनी या तिन्ही नेत्यांचा उल्लेख अनुक्रमे Naughty नामर्द, बिगड़े नवाब आणि नन्हें पटोले, असा केला आहे. त्यामुळे आता महाविकासआघाडीतील तिन्ही पक्षांकडून अमृता फडणवीस यांना कशाप्रकारे प्रत्युत्तर दिले जाणार, हे पाहावे लागेल.