अक्कलकोट/प्रतिनिधी: तालुक्यातील कलप्पावाडीमध्ये जन्मदात्या बापाने २८ वर्षाच्या मुलाचा डोक्यात कुऱ्हाड घालून खून केल्याची धक्कादायक घटना घडली आहे. रघुनाथ राजेंद्र जानकर असे खून झालेल्या मुलाचे नाव आहे. तर खून केलेल्या संशयित आरोपीचे राजेंद्र रघुनाथ जानकर (वय ४९) असे नाव आहे.
मुलगा रघुनाथ जानकर हा वडील राजेंद्र रघुनाथ जानकर यांच्याकडे दारूच्या नशेत मला ट्रॅक्टर घ्यायचा आहे. तुम्ही शेत विकून पाच लाख रुपये द्या, असे म्हणून शिवीगाळ करु लागला. तेव्हा संशयित आरोपी राजेंद्र जानकर यांनी रघुनाथला मी शेत विकून पैसे देत नाही, तुला काय करायचे ते कर, असे बोलले, त्यानंतर मुलाने वडिलांची कॉलर पकडली.
तेव्हा राजेंद्र यांनी त्यास ढकलून देत कुऱ्हाडीने रघुनाथच्या डोक्यात घाव घातला. तेव्हा तो रक्ताच्या थारोळ्यात पडला. परत त्याच्या पाठीत व डोक्यात कुऱ्हाडीने वार केले. वडील राजेंद्र रघुनाथ जानकर यांच्या विरोधात मंगलदास राजेंद्र जानकर यांनी दक्षिण पोलिस ठाण्यात फिर्याद दिली आहे. याचा तपास सहाय्यक पोलिस निरीक्षक बी. एच. काकडे हे करीत आहेत. गुरुवार (ता. ३०) हा प्रकार घडला आहे.
0 Comments