अंधश्रद्धेचा कळस ! करंट लागला म्हणून पाच वर्षांच्या मुलाला मातीत पुरलं, लेकराने गमावले प्राण.....

एक घटना उत्तरप्रदेशातही घडली ज्यामुळे पाच वर्षांच्या चिमुरड्याला आपला जीव गमवावा लागला. या घटनेचे फोटोही सध्या सोशल मीडियावर व्हायरल होत आहेत. 

उत्तरप्रदेशातल्या बरेलीमधल्या एका गावात चार्ज होणाऱ्या एका इलेक्ट्रिक रिक्षाच्या वायरचा स्पर्श झाल्याने एका मुलाला करंट लागला. करंट लागल्याने तळमळत असलेल्या या मुलाला नातेवाईकांनी त्वरित रुग्णालयात नेण्याऐवजी त्यांनी त्याला मातीत पुरलं आणि घरगुती उपचार करु लागले. या प्रकारामुळे या चिमुरड्याने आपले प्राण सोडले.  उत्तरप्रदेशातल्या बरेली भागातल्या गिरधरपूर या गावातली ही घटना आहे. अंधश्रद्धा आणि अज्ञानाच्या कचाट्यात सापडून या पाच वर्षांच्या लेकराचा हकनाक बळी गेला. आजतकने याबद्दलचं वृत्त दिलं आहे.

 रिक्षाच्या चार्जिंगच्या वायर्स अशा प्रकारे निघाल्या की त्यांचा त्या मुलाला स्पर्श झाला आणि त्याला विजेचा मोठा झटका बसला. त्यानंतर तो जोरजोरात ओरडू लागला. काहीतरी करुन आसपासच्या लोकांनी त्याला या तारांपासून वेगळं केलं. एकमेकांच्या सल्ल्याने लोकांनी त्याला मातीमध्ये पुरलं आणि मनाला हवे तसे घरगुती उपचार करु लागले. एका तासामध्ये त्याच्यावर कोणताही परिणाम झाला नाही.