बाळासाहेब थोरातांनी वर्षभराचं मानधन मुख्यमंत्री सहाय्यता निधीत देण्याची केली घोषणा

राज्यात दिवसेंदिवस कोरोना संसर्ग वाढतच चालला आहे. वाढत्या रुग्ण संख्येबरोबर आरोग्य सुविधांचा तुटवडा निर्माण होत आहे. या पार्श्वभूमीवर सरकारला मदत करण्यासाठी अनेक संस्था आणि लोक पुढे येत आहेत. त्यातच आपलं वर्षभराचं मानधन मुख्यमंत्री सहाय्यता निधीत देण्याची घोषणा काँग्रेस नेते बाळासाहेब थोरात यांनी आज केली आहे.

लसीकरणाबद्दल बोलताना ते म्हणाले, आम्ही लसीकरणाबाबत आग्रही आहोत. मात्र लसीकरणासाठी येणारा खर्च मोठा आहे. म्हणूनच माझं वर्षभराचं मानधन राज्यासाठी देणार आहे. यासोबतच कॉँग्रेसचे ५३ आमदार आपलं महिन्याभराचं मानधन मुख्यमंत्री सहाय्यता निधीत देणार असल्याचंही त्यांनी सांगितलं.

तसंच मोफत लसीकरणाबाबत महाविकास आघाडीचं एकमत असल्याचंही त्यांनी स्पष्ट केलं आहे. त्याचसोबत मोफत लसीकरणासाठी सोनिया गांधी आणि राहुल गांधी हे दोघेही आग्रही असल्याचं त्यांनी सांगितलं आहे.