कोल्हापूर : गुन्ह्यात मदत करण्यासाठी लाच घेताना वडगाव पोलिस उपनिरीक्षक एसीबीच्या जाळ्यात

कोल्हापूर: गुन्ह्यात मदत करण्यासाठी तक्रारदारकडून ५ हजारांची लाच घेताना पेठवडगाव पोलिस ठाण्यातील उपनिरीक्षक लाचलुचपत प्रतिबंधक विभागाच्या जाळ्यात सापडला. त्यामुळे कोल्हापूर पोलिस  दलात खळबळ उडाली असून चंद्रकांत श्रीपती भोसले (रा. भोसलेवाडी, कोल्हापूर) असे ताब्यात घेतलेल्या उपनिरिक्षकाचे नाव आहे.  

याबाबत मिळालेली माहिती अशी की, वडगाव पोलिस ठाण्यात विवाहितेचा छळ व आत्महत्येस प्रवृत्त केल्याप्रकरणी तक्रारदार यांचे पक्षकारावर गुन्हा दाखल आहे. या गुन्ह्यामध्ये मदत करण्यासाठी ५ हजार रुपयांची लाच मागणी उपनिरीक्षक भोसले याने केली होती. ती स्वीकारताना भोसले याला रंगेहाथ पकडण्यात आले. 

ही कारवाई एसीबीचे उपअधीक्षक आदिनाथ बुधवंत यांच्या मार्गदर्शनाखाली पोलिस निरीक्षक युवराज सरनोबत, सहाय्यक फौजदार बबंरगेकर, शरद पोरे,  नवनाथ कदम, सुनिल घोसाळकर या पथकाने केली.