बार्शी/प्रतिनिधी:
शिक्षणाची आद्यगुरू क्रांतीज्योती सावित्रीबाई फुले यांच्या १९० व्या जयंतीनिमित्त, क्रांती बहुउद्देशीय संस्था बेलगाव व डाक विभाग बार्शी यांच्या संयुक्त विद्यमाने कोरोनाचा प्रादुर्भाव रोखण्यासाठी शासकीय नियमांचे पालन करत, मौजे बेलगाव येथे आधार कार्ड शिबिराचे आयोजन करण्यात आले होते. कार्यक्रमाच्या सुरुवातीला उपस्थित मान्यवरांच्या हस्ते सावित्रीबाई फुले यांच्या प्रतिमेचे पूजन करून त्यांना वंदन करण्यात आले.
या शिबिरामध्ये नवीन आधार कार्ड काढणे, आधार कार्ड मध्ये दुरुस्ती करणे तसेच पोस्ट विभागाच्या वतीने जनतेसाठी राबविण्यात येत असलेल्या शासकीय विविध योजनांची माहिती देणे आदि उपक्रम राबविण्यात आले. पोस्ट विभागाच्या विविध योजनांची माहिती देत आपले गाव सुकन्या ग्राम व डिजिटल इंडिया ग्राम बनवण्यासाठी युवकांनी पुढाकार घेण्याचे आवाहन डाक विभागाचे उपविभागीय अधिकारी श्री अमित देशमुख साहेब यांनी केले.
या कार्यक्रमाचे औचित्य साधत बेलगाव येथील सुपुत्र मेजर राहुल पाटील यांनी देश सेवेसाठी भारतीय सेनेमध्ये १७ वर्षे पूर्ण केल्याबद्दल क्रांती बहुद्देशीय संस्थेच्या वतीने त्यांचा सन्मान करण्यात आला. या कार्यक्रमाप्रसंगी संस्थेचे संस्थापक अध्यक्ष धीरज शेळके, सचिव आगतराव शेळके, डाक विभागाचे उपविभागीय अधिकारी अमित देशमुख, प्रणाली प्रबंधक माधव बारस्कर, डाक साहाय्यक रघुनाथ डावलबाजे, डाक आवेक्षक अजित नडगिरे, रवींद्र बगाडे, पोस्टमास्तर दिनकर माळी, गणेश पवार, मेजर राहुल पाटील, महाराष्ट्र पोलीस लक्ष्मण शेळके, आदर्श शिक्षक गोकुळदास शेळके, शशिकांत शेळके, गावातील ग्रामस्थ आणि लाभार्थी मोठ्या संख्येने उपस्थित होते.
0 Comments