सोलापूर लोकसभा मतदारसंघातील भाजपचे उमेदवार आ. राम सातपुते यांनी प्रचार करत असताना आदर्श आचारसंहितेचा भंग केल्याचा अहवाल जिल्हा निवडणूक निर्णय अधिकारी तथा जिल्हाधिकारी कुमार आशिर्वाद यांनी निवडणूक आयोगाकडे पाठविला होता. आयोगाने याप्रकरणी पुनर्चीकशी करुन अहवाल पुन्हा सादर करण्याचे आदेश निवडणूक निर्णय अधिकारी यांना दिले आहेत.
सोलापूर लोकसभा मतदारसंघात निवडणूक काळात प्रचार करत असताना आ. सातपुते यांनी मशिदीमधून फतवे बाहेर पडत असल्याचे वक्तव्य केले होते. आ. सातपुते यांचे हे वक्तव आदर्श आचारसंहितेचे भंग करणारे असल्याची तक्रार निवडणूक निर्णय अधिकारी यांच्याकडे विरोधकाकडून करण्यात आली होती. यानुसार जिल्हाधिकारी आशीर्वाद यांनी याप्रकरणाची चौकशी करून या प्रकरणात आ. सातपुते यांच्याकडून आचारसंहितेचा भंग झाला असल्याचा अहवाल निवडणूक आयोगाकडे पाठविला होता.
निवडणूक आयोगाने याप्रकरणी पुनर्चीकशी करुन अहवाल सादर करण्याचे आदेश दिल्याने जिल्हा प्रशासनाकडून याबाबत पुनर्चीकशी सुरु करण्यात आली आहे. चौकशी पूर्ण झाल्यानंतर पुन्हा एकदा निवडणूक आयोगाकडे अहवाल पाठविण्यात येणार असल्याची माहिती निवासी उपजिल्हाधिकारी मनिषा कुंभार यांनी दिली.
लोकसभा निवडणूक काळात भाजप नेते देवेंद्र कोठे यांनीही सोलापुरात बांगलादेशी नागरिकांचे वास्तव असल्याचे वक्तव्य केले होते. त्यांच्या वक्तव्यातही आदर्श आचारसंहितेचा भंग झाल्याचे दिसून आल्याने त्यांच्याविरुध्दही अहवाल राज्य निवडणूक आयोगाकडे पाठविण्यात आला होता. याप्रकरणी पोलिसांनी गुन्हा देखील दाखल केला आहे. निवडणूक आयोगाच्या नव्या आदेशानुसार जिल्हा निवडणूक निर्णय अधिकारी यांच्याकडून आयोगास पुन्हा काय अहवाल पाठविण्यात येणार व आ. सातपुते यांच्याविरुध्द कारवाई होईल का? याचीही उत्सुकता मतदारांना आहे.
0 Comments