बीड जिल्ह्यामधील परळी वैजनाथ येथील एक २२ वर्षीय तरूणी पूजा चव्हाण हिच्या आत्महत्या प्रकरणाच्या अनुषंगाने विविध माध्यमांमध्ये तसेच समाजमाध्यमांवर विविध प्रकारच्या चर्चा सुरू आहे. पूजा चव्हाण हिच्या आत्महत्या प्रकरणाच्या काही ऑडिओ क्लिप्स सुध्दा व्हायरल झाल्या आहेत. या प्रकरणावरून बंजारा समाजात मोठे असंतोषाचे वातारण पसरले आहे.
या प्रकरणाची सखोल चौकशी करण्यात यावी, अशी मागणी माजी मुख्यमंत्री आणि विरोधी पक्षनेते देवेंद्र फडणवीस यांनी पोलीस महासंचालकांना पञ लिहून केली आहे. पोलिस महासंचालकांना दिलेल्या पञात देवेंद्र फडणवीस म्हणाले आहे की, पूजा चव्हाणच्या कथित आत्महत्याप्रकरणातील काही ऑडिओ क्लिप्स सोशल मीडियावर व्हायरल होत आहेत. अशा एकूण १२ ऑडिओ क्लिप्स माझ्या कार्यालयास प्राप्त झाल्या आहेत. आपल्या अवलोकनार्थ त्या ऑडिओ क्लिप्सची प्रत या पत्रासोबत जोडत आहे.
या ऑडिओ क्लिप्समध्ये बोलणारे कोण आहेत, त्यांच्या संवादाचा नेमका अर्थ काय, त्यातून पूजा चव्हाणची खरोखर आत्महत्या आहे, की तिला आत्महत्येस प्रवृत्त करण्यात आले, असे अनेक प्रश्न यानिमित्ताने उपस्थित होत आहेत. एकूणच तिच्या मृत्यूबाबत संशयाचे वातावरण यामुळे निर्माण होत आहे. सध्याचा तपास हा वरकरणी होत असल्याचे खेदाने नमूद करावेसे वाटते, असे फडणवीस या पञात म्हणाले आहे. ही आत्महत्या किंवा आत्महत्येमागील घटनाक्रम संशयास्पद असल्याचा आरोप त्यामुळे बंजारा समाजातून मोठ्या प्रमाणात होतो आहे. त्यामुळे या सर्व ऑडिओ क्लिप्सची सखोल आणि सर्वंकष चौकशी होणे नितांत गरजेचे आहे. ही चौकशी तत्काळ करून बंजारा समाजात अतिशय लोकप्रिय असलेल्या या तरुणीला तत्काळ न्याय देण्यात यावा, आणि दोषींवर कठोर कारवाई करण्यात यावी, अशी मागणी देवेंद्र फडणवीस यांनी पोलिस महासंचालकांकडे केली आहे.
0 Comments